اهلا اهلا بكل واحد وواحده يخش مدونتي و اهلا اهلا اهلا بكل واحد يخش مرتين والثانية مجانا >> يعاني من خسائر كبيرة في الزوار ..

تعرفون انتم وش يصير برمضان من تسابق القنوات على تقديم البرامج والكم الإعلاني الضخم وكل قناة تسوق لبرامجها .. وتعرفون برامج الكميرا الخفية اللي اقرفونا فيها وتعرفون انه بدا ينطبق عليهم المثل اللي يقول ” عجوز طاحت بعبس ” من جد الإعلام العربي يعاني من نقص فيتامين غ الخاص بالإبداع والتجديد >> لا تسألون عن الفيتامين ما يعرفه الا انا ترا

وكل قناة الله يكرمكم تعلن عن كاميرا خفية جديدة والكل يعرف محمد الصيرفي اللي له كم سنة ينصب على الناس مسوي لي فيها خبير كاميرا خفية ومقالب واكتسب شهرته بالكذب .. هالشخص له برنامج اسمه “ الأسنصيد ” اعلنوا عنه قبل رمضان بشهرين تقريبا واللي فكرته انه يعلق فيه الاصنصير ويصير بموقف صعب هو وأحد الفنانين واكثرهم فنانات .. والكل يدري انا وانتم وهو والمشاهدين والعالم العربي والغربي والشرق اوسطي .. والشرق غربي وحتى الشمال الجنوبي كلنا متأكدين 100000% انه نصاب ومخادع وكذاب واللي اثبت لنا انه نصاب وكلاك المقطع اللي انتشر قبل اذاعة البرنامج مع الممثلة الوقحة هذيك شينة الوجه والطبع اللي تجيب التهاب رئوي في المخ من اول نظرة .. شوفوا المقطع لمجرد الذكرى .. فقط ولا انا عارف انكم كلكم شايفينه ..

طيب كلنا الان عرفنا واقتنعنا انه كذب × كذب ونصب واحتيال كالعادة وانا ما اعترض على ان البرنامج كذب ولا اقول شي اصلا الفن عفن وكله من اوله لآخره نصب × نصب وهذا شي مسلّم فيه ولا جدال فيه .. لكن اللي قاهرني مو ان البرنامج كذب .. اللي قاهرني ان القناة “ فنون ” ما زالت مصررررررررة على أنها تبث البرنامج مع ان أمره مفضووووووووووح والأرض كلها تدري انه نصب .. ليش القناة وجهها وسيع ومغسول بمرق .. يعني من الأدب انها توقف البرنامج .. بس تدرون عاد ..  الفن ما له علاقة بالأدب .. >>

من الخسران الأكبر من البرنامج .. اي أحد أضلع هذا الرباعي .. هل هو المشاهد ؟! هل هو القناة ؟! هل هو المذيع الغبي ؟! هو هو الفنان المستضاف الأغبى ؟!

بظني أن اغباهم هو المشاهد لأنه هو يعلم انه خدعة وهو لن يستفيد شيئا من المتابعة غير انه يشاهد فلم مفبرك .. واما الاضلع الثلاثة للمضلع فهم يستفيدون ماديا على الاقل رغم الخسائر الأخرى من خسارة الذنوب وخسارة المصداقية وخسارة الجمهور ..

لكن اللي يثير استغرابي الفنانين المستضافين .. ما يخافون على شهرتهم ومصداقيتهم .. يعني تخيلوا لو فرضنا ان المذيع استضاف 30 فنان طيلة ايام رمضان والكل يعرف ان المذيع والفنان كلهم كذبوا في الحلقة .. يعني 30 فنان عربي مشهور كللللللللللللهم كذابين مع انني متأكد من انه بعض الحلقات فيها اكثر من فنان .. يعني نفهم من البرنامج ان فنانينا كذبة ومخادعون .. لكن صدق القائل ان الفن عفن .. ويكفيك أن العرب لما عرفوا قدر الفنانين أسموا الحمار فنانا ..

دمتم بأنس ..